A digital magazine dedicated to children & youths.

श्रावण

359

श्रावण

हत्केलाका रेखाहरुमा मिलाएर कोर्नु छ मलाई त,

-मेरै सपनाका आकृतिहरु

-कर्मका धर्साहरु,

-म हुनुको/ मेरो अस्तित्वको छापहरु

– मेरो पद्चापहरुले छोड्ने डोबहरु

अनि,

कोर्नु छ मेरो आफ्नो समयको प्रतिबिम्बहरु

ओ  प्रिय अपरिचित,

मेहन्दिले मेरो नाम किन कोरीनौ भनेर

कहिल्यै नसोध्नु ल!

यदि मेहन्दिले कोरिँदो हो त सम्बन्धको आयु,

– मक्किने थिएन बिश्वास,

घात- प्रतिघातको चङ्गुलमा पुरिएर

– चुँडिने थिएन आस्थाका डोरीहरु

-सिँच्ने थिएन कसैले आशुले शिरानी

-पिउनु पर्ने थिएन कहिल्यै पनि नुनिलो

पानीका बुँदहरु

-घृणा गर्ने थिएन कसैले सपना लिएर

आउने रातहरुलाई

-निस्सासिने थिएन यो खुल्ला र स्वतन्त्र

सन्सारमा मान्छे

-रुने थिएन झरी

-बिरहमा भुल्ने थिएनन् हार्मोनियमका किहरु

अनि,

-आफ्नो धावनमार्ग पूरा नगरीकनै

अस्ताउने थिएनन्

कयौं थान जिन्दगीहरु

म त चुराको हरियो गाढा रङ्गलाई

-आफ्नै बलबुताले पोत्न चाहान्छु मेरो इन्द्रेणीमा

– थप्न चाहान्छु छनछन आवाज

मेरो जिन्दगीको रफ्तारमा

ओ  प्रिय मानिस,

मेरो नामको चुराहरुले हात किन सजाइनौ भनी

कहिल्यै नसोध्नु है!

                                  हिरादेबी वाइबा